🌐 ବିଶ୍ୱ ସାକ୍ଷରତା ଦିବସରେ ରାୟଗଡ଼ାରେ ବିଭିନ୍ନ କାର୍ଯ୍ୟକ୍ରମ।

ରାୟଗଡ଼ା, ୦୮/୦୯/୨୦୨୫ –ଦେଶର ପ୍ରଗତିରେ ଶିକ୍ଷାର ଭୂମିକା ଅସମାନ୍ୟ ଏବଂ ଅପରିହାର୍ଯ୍ୟ । ଏହାକୁ ମଧ୍ୟନଜରରେ ରଖି UNESCO ୧୯୬୬ ମସିହାରେ ପ୍ରତିବର୍ଷ ସେପ୍ଟେମ୍ବର ୮କୁ “ଆନ୍ତର୍ଜାତୀୟ ସାକ୍ଷରତା ଦିବସ” ଭାବରେ ପାଳନ କରିବାକୁ ଘୋଷଣା କରିଥିଲା । ତାହାନୁଯାୟୀ ଆଜି ସାରା ବିଶ୍ୱ ସହିତ ରାୟଗଡ଼ା ଜିଲ୍ଲାରେ ମଧ୍ୟ ବିଶ୍ୱ ସାକ୍ଷରତା ଦିବସ ପାଳନ କରାଗଲା ।

ପ୍ରତ୍ୟେକ ବିଦ୍ୟାଳୟରେ ଛାତ୍ରଛାତ୍ରୀଙ୍କୁ ନେଇ ସଚେତନତା ରାଲି ଆୟୋଜନ କରାଗଲା । ଏହି ରାଲି ମାଧ୍ୟମରେ ନିରକ୍ଷରତାକୁ ଦୂର କରିବାକୁ ଆହ୍ୱାନ ଜଣାଗଲା । ସେପରି ସମସ୍ତ ବ୍ଲକରେ ସାକ୍ଷରତା ସମ୍ବଳିତ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

ଜିଲ୍ଲାସ୍ତରୀୟ ପ୍ରଧାନ କାର୍ଯ୍ୟକ୍ରମ ସରକାରୀ ବାଳିକା ଉଚ୍ଚ ବିଦ୍ୟାଳୟ, ରାୟଗଡ଼ାରେ ହୋଇଥିଲା । ଏହି ସମାରୋହରେ ମୁଖ୍ୟ ଅତିଥି ଭାବେ ଯୋଗଦେଇଥିଲେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀ ଭାଜାନଲାଲ ମାଝି । ସେହିପରି ଉପସ୍ଥିତ ଥିଲେ ଜିଲ୍ଲା ବିଜ୍ଞାନ ନିରୀକ୍ଷକ ଶ୍ରୀ ଦୀପକ କୁମାର ବେହେରା, ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ଶ୍ରୀ ଛବିଲାଲ ସିଂ, ଡାଏଟ୍‌ ବିଷମକଟକର ଅଧ୍ୟକ୍ଷ ଶ୍ରୀ ଜଗନ୍ନାଥ ମେହେର ଏବଂ ବାଳିକା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ ସୁନିତା ଭୋଇ

ସମାରୋହରେ ଅତିଥିବୃନ୍ଦ ବିଶ୍ୱ ସାକ୍ଷରତା ଦିବସର ଉଦ୍ଦେଶ୍ୟ, ନିରକ୍ଷରତା ଦୂରୀକରଣ, ଜାତୀୟ ଶିକ୍ଷାନୀତି ୨୦୨୦ ଓ ଭବିଷ୍ୟତ ପାଇଁ ଶିକ୍ଷାର କାର୍ଯ୍ୟପନ୍ଥା ସମ୍ପର୍କରେ ଆଲୋଚନା କରିଥିଲେ ।ଶେଷରେ ସିଆରସିସି, ଶ୍ରୀ ସଦାନନ୍ଦ ନାୟକ ସମସ୍ତ ଅତିଥିବୃନ୍ଦ, ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କୁ ଧନ୍ୟବାଦ ଜଣାଇ ସମାରୋହର ସମାପନ କରିଥିଲେ ।

📌 ସାକ୍ଷରତା ହେଉଛି ସମାଜର ପ୍ରଗତିର ପ୍ରଥମ ପଦକ୍ଷେପ – ଏହି ମନ୍ତ୍ର ସହିତ ବିଶ୍ୱ ସାକ୍ଷରତା ଦିବସ ରାୟଗଡ଼ାରେ ସଫଳତାର ସହିତ ପାଳନ କରାଗଲା ।