ରାୟଗଡ, 25 ଅଗଷ୍ଟ –ନିଖିଳ ଭାରତ ସ୍ବାୟତ୍ତ ଶାସନ ଦିବସ ପାଳନ ଉପଲକ୍ଷେ ରାୟଗଡ ପୌରପରିଷଦ ତରଫରୁ ଆଜି ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଛି। ସହର ମଧ୍ୟରେ ଥିବା ସମସ୍ତ ସରକାରୀ ଓ ବେସରକାରୀ ସ୍କୁଲର କନିଷ୍ଠ ଓ ବିରିଷ୍ଟ ଗ୍ରୁପ ଛାତ୍ରଛାତ୍ରୀଙ୍କ ମଧ୍ୟରେ ପ୍ରବନ୍ଧ, ବକ୍ତୃତା ଓ ଚିତ୍ରାଙ୍କନ ପ୍ରତିଯୋଗିତା କ୍ରମଶଃ କନ୍ଫରେନ୍ସ ହଲ, ଅଡିଟୋରିୟମ ଓ କୃଷ୍ଣଚନ୍ଦ୍ର ନଗର ଭବନରେ ଆୟୋଜିତ ହୋଇଥିଲା।
ଛାତ୍ରଛାତ୍ରୀଙ୍କ ମନରେ ସ୍ବଚ୍ଛତା ପ୍ରତି ସଚେତନତା, ନିଷ୍ଠା ଓ ଦେଶପ୍ରେମର ଭାବନା ଜାଗ୍ରୁତ କରିବାକୁ ଏହି ପ୍ରତିଯୋଗିତାଗୁଡ଼ିକ ଆୟୋଜନ କରାଯାଇଥିଲା। ପ୍ରଥମ, ଦ୍ୱିତୀୟ ଓ ତୃତୀୟ ବିଜେତାଙ୍କୁ ଚିହ୍ନଟ କରାଯାଇଥିବାବେଳେ ସମସ୍ତ ପ୍ରତିଭାଗୀଙ୍କୁ ପ୍ରଶଂସାପତ୍ର ପ୍ରଦାନ କରାଯିବ।
ଏହି ବର୍ଷର ସ୍ବାୟତ୍ତ ଶାସନ ଦିବସକୁ ଓଡ଼ିଶା ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗର ବିଜ୍ଞପ୍ତି ଅନୁସାରେ ରାୟଗଡ ପୌରପରିଷଦ ବିଶେଷ ଉତ୍ସାହ ଓ ଉଲ୍ଲାସ ସହ ପାଳନ କରୁଛି।
